Dili, 17 Marsu 2026: Faculdade de Filosofia e Ciências Humanas liu husi ninia Associação Académica dos Estudantes no Komisaun Organizadora, realiza atividade rejistrasaun loron dahuluk ba estudante foun sira nebe foin admitidu mai Fakuldade de Filosofia ba tinan akadémiku 2026. Iha prosesu rejistrasaun ne’e, Komisaun uza sistema dijital atu apoia prosesu rejistu no verifikasaun informasaun estudante sira nian. Uzu sistema ne’e ajuda ekipa servisu halo rejistrasaun ba informasaun estudante sira nian ho lalais, ordenadu no efisiente liu kompara ho sistema manual.

Ho utiliza sistema PORTAL AAE, prosesu atendimentu ba estudante sira bele hala’o ho orden no sistemátiku. Estudante sira mós bele hatama informasaun no konfirma informasaun nebe presiza atu kompleta prosesu rejistrasaun iha nível Fakuldade no Departamentu.

Konsidera implementasaun sistema dijital ne’e sai vantajen ida atu aumenta efisiénsia servisu no fasilita prosesu administrativu durante atividade rejistrasaun. Alende ne’e, sistema ne’e mós ajuda redús posibilidade sala iha rejistu dadus estudante sira nian.

Atividade rejistrasaun loron dahuluk ne’e lao ho partisipasaun maka’as husi estudante admitidu sira ne’ebé hatudu sira ninia motivasaun atu kompleta rejistrasaun hodi prepara ba Programa Orientasaun Akadémika 2026. No liu husi rejistrasaun ne’ebé realiza iha loron ohin, estudante sira ne’ebé rejistadu mak totál hamutuk 105 pessoas, husi totál ne’e iha mane 52 pessoas no Feto 53 Pessoas. Ikus liu, faze Rejistrasaun ne’e sei kontinua hala’o tuir kalendariu atividade nebe determina ona, mak akontese iha loron 18-19 Marsu 2026.

AAE-FFCH.