AAE-FFCH,Dili : Universidade Nacional Timor Lorosa’e (UNTL) liu husi senadu jeral no senadu Fakuldade hamutuk sanulu (10) kansela orientasaun nivel Universidade nian tanba la iha fatin adekuadu hodi tuir prasa akadémika.

Nune’e, Fakuldade de Filosofia e Ciências Humanas liu husi senadu no orientador sira, deside hodi orienta estudante foun sira fila fali ba idak-idak nia Fakuldade hodi rona informasaun husi Komisaun Organizadora (KO) hodi tuir fali prasa akadémika Fakuldade nian iha loron 26-27 fulan Marsu 2026.

Hafoin senadu Jeral hamutuk ho senadu sira husi Fakuldade sanulu blokeia orientasaun nivel universidade, Senadu FFCH Denilson Carlos Ximenes Correia husu ba estudante foun anu akadémiku 2026 atu labele tauk no pániku ho situasaun ne’ebé mak akontese tanba ne’e laos buat foun mak akontese iha Universidade.

“Tuir kalendariu Universidade; 25/03/2026 realiza orientasaun akadémika iha nivel Universidade maibe hetan blokeia husi Senadu Jeral hamutuk ho Senadu Fakuldade sanulu, tanba fatin la sufiesiente atu kooresponde ba volume estudante foun husi Fakuldade sanulu”.

“Hau husu ba estudante foun soira iha Fakuldade de Filosofia atu labele tauk no pániku ba situasaun sira hanesan ne’e tanba ne’e laos buat foun ne’ebé foin akontese iha universidade”. Dehan Senadu FFCH Denilson Carlos Ximenes Correia ba estudante foun tinan akadémiku 2026, iha koridor Filosofia, 25/03/2026.

Entretantu, prasa akadémika FFCH sei realiza fila fali iha loron 26-27 fulan Marsu ba estudante foun tinan 2026 husi Fakuldade de Filosofia e Ciências Humanas, hamutuk atus ida tolunulu resin neen (136) ne’ebé rejistradu iha Fakuldade de Filosofia. 

Fotografer : Marciana da Conceição