Dili, 19 Marsu 2026: Faculdade de Filosofia e Ciências Humanas liu husi ninia Associação Académica dos Estudantes no Komisaun Organizadora, ohin realiza loron ikus rejistrasaun estudante foun lao ho diak. Atividade durante loron tolu ne’e hala’o ho orden no efisiente, ho apoiu husi ekipa teknika rejistrasaun no membru komisaun sira ne’ebé iha prontidaun aas hodi kontribui ba atividade akadémika refere. No Sistema dijitál ne’ebé uza iha prosesu rejistrasaun hatudu ninia vantajen, hanesan fasilita prosesu, reduz tempu espera, no garante organizasaun dadus ne’ebé loos no seguru.

Durante rejistrasaun ne’e, estudante foun barak mak mai halo rejistrasaun, kompleta dadus pesoál no simu informasaun importante kona ba programa orientasaun ne’ebé sei hala’o iha loron tuir mai depende ba despaixu Universidade(Re. N.º: 27/UNTL/VRAA/III/2026) ne’ebé determina kalendariu ba Programa Orientasaun Akadémika tinan ida ne’e mak monu iha loron 25-27 Marsu 2026. No bazeia ba rejistrasaun ne’e, total estudante foun ne’ebé komisaun rejista ona atu partisipa iha orientasaun akadémika mak hamutuk 134 pessoas, mane 66 pessoas, no feto 68 pessoas.

Ho remata rejistrasaun ne’e, Fakuldade de Filosofia prontu atu simu no orienta estudante foun sira iha programa orientasaun akademika, ne’ebé sei fó introdusaun kona ba ambiente universitaria, sistema sira/regulamentu interna, no moris akademiku iha futuru.

Komisaun organizadora hein katak estudante sira bele aproveita oportunidade ne’e atu adapta diak ho vida universitaria no prepara an ba dalan estudu ne’ebé refleta ba natureza akadémika ne’ebé universidade opta.

⚠️Aviza ba Estudante Foun:

Informa ba estudante foun sira atu akompaña nafatin informasaun kona-bá atividade Gladi/esnsaiu hodi prepara ba Orientasaun Akadémika 2026.

AAE-FFCH